Träume

1.    Jahre hob i traumlos gschlaffa, denn i woa einfach zfrien und miad,
uaplötzlich is mei Schlaf dann unruhich woan.
Seitdem were jede Nacht ins Land dea Träume entfüaht,
drin in mein Kopf wiad jede Nacht a neia Traum geboan.

2.    Bittabesa Traum, kumm geh doch weg vo mia,
i hob längst gmeakt, dass i bloß dram,
drum hob i a koa Angst und fiacht mi ned voa dia,
hau schnell ab, wal i sunst siaße Tram vasamm.

3.    Träga lahma Traum, du bist mei Traumzeit goa ned weat,
denn du bist vui znah am echtn Lebn dro,
bei meina Traumfee hob i mi längst iwa di beschweat
und hobs gfragt, obs di wenigstns kiazn ko.

4.    Bittasiaßa Traum, du ergibst zwar koan Sinn,
di zum Vatreim war koa Problem und gang ganz schnell,
doch i dram di weida wal i einfach neigierich bin,
fia mia dein Füm ruhich voa, kumm vazöll.

5.    Wundascheena Traum, kumm ganz schnell wieda zruck,
mei Wecka bappt an da Wend und is etz stumm,
wenn i mein Kopf nuamal ganz fest ins Kissn druck,
dann kannts sei, dass i wieda in di einekumm.

6.    Und wiare da so liech und meine Augn zuazwick,
hoff dass i featichdrama deaf in alla Ruah,
frog i mi, kumma Träume aus da Traumfabrik,
und wenn ja, wea stellts doat hea, und wea talts zua?

© www.jonnybeer.de