Raubrittamoasta

Raubrittamoasta

1. Heid is Vasammlung af da Buach, und koana deaf do fälln,
     wal mia woin haid an neia Raubrittamoasta wälln!
     Drum kummts alle affe, wenn d’Ua uns achte zoagt,
     des wead a richtigs Fest, fia Speis und Drank is bestns gsoagt!

REFRAIN:

     Und dann fress ma und mia saffa, und mia reihan undan Tisch,
     i zwick d’Weiwa in Oasch und Busn, grod wiar es dawisch.
     Wenn ma nix mea einebringa, soich ma draßn hi am Baam,
     wal ma koa gemeine Ritta, sondan Raubritta san.

2. Da easchte Redna is da Becka: „Da greßde Raiwa des bin i,
     wea jeds Joa a Zehntl daira, des schaffts ia andan nie.
     Anstatt a Mö nimm i etz Sechschpa, anstatt a Müch machts Wassa an Gschmoch,
     so wea i nu schnella reich, a wenn’s ned schmeckt, ia kaffts es doch.“

3. Dann steht a Mordsdrumbrackl auf, da Metzga erhebt sei Stimm:
     “Zehn Prozent im Joa san no ned gnua, weshalb ich zwanzich nimm.
     Fia d’Sai da zohle weng, doch beim Vakaffa lang i hi,
     drum segtses endlich ai, da greßte Raiwa des bin i!“

REFRAIN

4. Ais Dritta red da Dokta: „I kann valanga wos i wü,
     wenn’s aich zwickt, dann zoids ia ois, füa mi vü Geld füa wenich Müh.
     Vadian zehnmal so vü wia ia, reiß mia dabei koan Haxn as,
     drum waids hoid einfach mi, i moans eanst, des is koa Spaß!“

5. Und etz endlich plead da Pfoara, und alles head brav zua:
     “An Haffa Geld des raub eich i, und i brauch dafüa nix dua.
     Beim Raiwan da hüft mia da Staat, treibt Steian ai füa mi,
     und am Sundoch wennts in d’Kiacha laffts hoid i aich s’Keawl hi!“

REFRAIN

6. Dann steht im Eck hint oana auf, vo dem koana woas weas is,
     kloa und dia und bugld mit am hundsgemeina Gfries.
     “I bin da greßte alla Raiwa, füa mei Gia bin i bekannt,
     i stü die Häifd vo eiam Geld, Vadda Staat wea i genannt!“

7.   Nachdem dann alle gred hom, gibt’s no vü zum Diskutiern,
     weam solln ma denn etz wähln, und so manchem raucht as Hian.
     Zu später Stund, total besoffen, beschließt der Ritterrat:
     Neia Raubrittamoasta is ab moang da Vadda Staat!

REFRAIN