Jack      Hörprobe

1.    Du laffst Joa und Dog schweabewaffnet umanand,
allawal im selbn Outfit und im selbn Gwand.
Deine Augn san unergründlich, wia aus Beanstein gmacht,
gloane Schlitz draß in da Sunna, runde Kugln in da Nacht.
Dei Boat san bloß dreißg Hoa, a empfindlichs Tastorgan,
wia Antennen stengas weg, wals ja Fühla san.

2.    Du bist imma gleich guat drauf, schlechte Laune is dia fremd,
bleibst imma cool und locka, bist grod as Gegntal vo vaklemmt.
Deine Kollegn fiachtn s’Wassa, du planscht drin umanand,
Angst voa fremde Leit scheint dia völlich unbekannt.
Bist a im Winta draßn, wenn’s da wichtich scheint
und a treue Seele, halt a echta Freind.

33.     Leida kannst ned ren, owa du bist a ned stumm,
gewast nia zua, dass’d ois vastehst, do stellst de liawa dumm.
Als Moasta dea Vaständigung oawast du mit alle Tricks,
host a heiliche Geduld, as Woatn macht dia nix.
Du woast wia spät dass is, obwohl du d’Ua ned kennst,
dei innre Ua soagt dafia, dass’d Brotzeit ned vapennst.

44.    Obwohl du ziemlich eihaust, weast du doch ned fett,
am Omd do weast aktiv, untam Dog da liegst im Bett.
Manchmal fangst an Vogl oda a a Maus,
de maxt bloß hi und frißtas ned, dann ziagstas ei ins Haus.
Duast nie wos i gean hätt, dia wos zum Schaffa is umsunst,
trotzdem nützlich zum eascheina, du beheascht die Kunst.

55.    Woaßt an woama Blotz zum schätzn, im Relaxn bist du guat,
du kamst gwiß iwan Zaun, trotzdem gehst du ned fuat.
Wenn i vo da Oawat kumm, dann woatst scho an da Dia,
as Feansen is dia wuascht, und trotzdem hoggst Stundn newa mia.
Du bist a liebensweates Wesn und kummst glei nach mein Schatz,
du bist und bleibst hald einfach da Jack, mei Lieblingskatz!