D'Einsicht

D’Einsicht

1. Kumm hock de umara an mein Tisch, owa halts Mai solang i red,
und dua bloß ned so scheiheilig, i glaab du woaßt, um wos dass geht.
I kenn di etz scho ziemlich lang, owa langsam sieche ei,
wenn i no a Joa mit dia vabring, weads wieda a valoans Joa sei.

REFRAIN:
Da Deifl soll di holn, geh ma aus de Augn,
i loss mi nimma vo dia einalegn!
Jeds Woat vo dia is glogn, i wea da nix mea glaum,
und hoff, i brauch di nie mea wiedasegn.

2. I kenn di scho aus meina Jugend, seitdem host mi betrogn,
und alle deina scheena Redn san eastunkn und ealogn.
Host mi vaändat heimlich und ganz langsam, und i Depp hob mi gschmeichlt gfühlt,
etz eascht meake, du host bloß Hanskaschperl mit mia gschpült.

REFRAIN

3. Den eigna Fehla zum Erkenna hod me Übawindung kost,
zu gean hob i gschaut duach de rosa Brülln, de du mia afgsetzt host.
Host so manche Hemmung weggablasn, mi entfüat in a fremde Welt,
am nächstn Dog hob i dann imma zoid, wenn dei Gift mein Köapa quält.

REFRAIN

4. Du nennst di Föadara dea Gsellichkeit, drum bist du iwarall dabei,
af jedn Fest da find ma de, aus oam Glos wean schnell drei.
Du belebst den Geist, und genau deswegn megn so vui Leid di sea,
doch dass ma a wos meagt, braucht ma vo dia imma mea.

REFRAIN

5. Doch da schweaste Voawuaf vo die vün, die i gecha di eaheb,
is dea daßd mi umbringa wolltst, i bin froh, dass i no leb.
I fang nomal o vo voan, eascht ohne di fühl i mi wohl,
spät hobes gschbannt, doch liaba spät als nie, leb wohl, Könich Alkohol!

REFRAIN